Bu gün işdən çıxarılan başçı seçkiyə girir? – Sensasion iddia

Bu gün Oğuz RİH başçısı vəzifəsindən azad edilən Eyvaz Qurbanovun 1 sentyabrda keçiriləcək parlament seçkisində namizəd kimi iştirak edəcəyi gözlənilir.

TEMPİNFO bildirir ki, bu barədə Axar.az-a daxil olan məlumatda iddia edilib.

Bildirilir ki, o, namizədliyini doğulduğu rayondan – 117 saylı Oğuz-Qəbələ seçki dairəsindən irəli sürə bilər.

Qeyd edək ki, E.Qurbanovla bağlı bu iddia təsadüfi deyil. Çünki o, bundan öncə də MM-də təmsil olunub.

Belə ki, 1963-cü ildə Oğuzun Bucaq kəndində doğulan E.Qurbanov 1984–1988-ci illərdə Dövlət Bədən Tərbiyəsi İnstitutunda, 2001–2004-cü illərdə isə Prezident yanında Dövlət İdarəçilik Akademiyasında təhsil alıb.

1984–1999-cu illərdə Tofiq Bəhramov adına Respublika Stadionunun direktoru vəzifəsində işləyib. Azərbaycan Milli Olimpiya Komitəsinin üzvüdür. 2000-ci ildən Milli Olimpiya Komitəsinin Bakı Olimpiya Kompleksinə direktorluq edib. 2005–2010-cu illərdə isə Oğuz-Qəbələ seçki dairəsindən III çağırış Milli Məclisin deputatı olub.

2011-ci ildən Oğuz Rayon İcra Hakimiyyətinin başçısı vəzifəsində çalışırdı.